मुंबई : स्मॉलकॅप कंपनी आदित्य व्हिजन लिमिटेडच्या शेअर्सने आज गुरूवारी मोठी उसळी घेतली आहे. कंपनीचे शेअर्स ७ टक्क्यांहून अधिक वाढून ४९४.३० रुपयांवर पोहोचले. Aditya Vision चे अध्यक्ष आणि व्यवस्थापकीय संचालक यशोवर्धन सिन्हा यांनी बुधवार ३ सप्टेंबर रोजी ब्लॉक डीलद्वारे कंपनीतील त्यांचा ५.१ टक्के हिस्सा ३०० कोटी रुपयांना विकला. सिन्हा यांनी बीएसईवर सरासरी ४६०.३७ रुपयांच्या किमतीत ३२.६ लाख शेअर्स विकले. तसेच, एनएसईवरही तेवढेच शेअर्स ४६१.०४ रुपयांच्या किमतीत विकले गेले.








शेअर्सचे खरेदीदार कोण



अ‍ॅक्सिस म्युच्युअल फंडने Aditya Vision चे २४ लाख शेअर्स ६४.४ कोटी रुपयांना खरेदी केले. तसेच मोतीलाल ओसवाल म्युच्युअल फंडने कंपनीचे ८.६ लाख शेअर्स खरेदी केले. जून २०२५ पर्यंतच्या आकडेवारीनुसार, यशोवर्धन सिन्हा यांचा आदित्य व्हिजनमध्ये ३२.६ टक्के हिस्सा होता. ते प्रवर्तक समूहातील सर्वात मोठे शेअरहोल्डर आहेत. कंपनीमध्ये प्रवर्तक समूहाचा हिस्सा ५३.२ टक्के आहे. म्युच्युअल फंडांचा या कंपनीमध्ये ९.५ टक्के हिस्सा आहे.






शेअर्सचा परतावा



गेल्या ५ वर्षात आदित्य व्हिजन लिमिटेडचे शेअर्स १९८००% पेक्षा जास्त वाढले आहेत. शेअर्स १८ सप्टेंबर २०२० रोजी २.४७ रुपयांवर होते. आता ४ सप्टेंबर २०२५ रोजी शेअर्स ४९४.३० रुपयांवर पोहोचले आहेत. गेल्या ३ वर्षात आदित्य व्हिजनच्या शेअर्सने २४३ टक्के परतावा दिला आहे. शेअर्सचा ५२ आठवड्यांचा उच्चांक ५७४.९५ रुपये आहे. तर ५२ आठवड्यांचा नीचांक ३२८.२५ रुपये आहे.








स्टाॅक स्प्लिट



आदित्य व्हिजन लिमिटेडनेही आपल्या शेअर्सचे विभाजन म्हणजेच स्टाॅक स्प्लिट केले आहे. कंपनीने एका शेअरचे विभाजन १० शेअर्समध्ये केले आहे. ऑगस्ट २०२४ मध्ये कंपनीने त्यांचे १० रुपये दर्शनी मूल्याचे शेअर्स १ रुपये दर्शनी मूल्याचे १० शेअर्समध्ये विभागले.