आपल्या सरकारच्या सांगण्यावरून पाकिस्तान क्रिकेट बोर्डाने (PCB) टी-२० वर्ल्ड कप २०२६ मध्ये भारतासोबत खेळण्यास नकार दिला आहे. यानंतर आयसीसीने (ICC) त्यांना या प्रकरणावर फेरविचार करण्यास सांगितले होते. त्यानंतर श्रीलंका क्रिकेट बोर्डानेही पीसीबीला या विषयावर विचार करण्याचा सल्ला दिला होता. आता या संदर्भात एक मोठे अपडेट समोर आले आहे. रिपोर्ट्सनुसार, हा वाद लवकरात लवकर संपवण्यासाठी पाकिस्तान क्रिकेट बोर्डाने आता आयसीसीशी चर्चा करण्यास सुरुवात केली आहे.

​मिळालेल्या माहितीनुसार, पाकिस्तान क्रिकेट बोर्डाला आता आयसीसीकडून होणाऱ्या कारवाईची भीती वाटू लागली आहे. याच कारणामुळे हा वाद मिटवण्यासाठी त्यांनी आयसीसीशी फोनवर चर्चा केली आहे. मात्र, हा कॉल अधिकृतपणे झालेला नाही. खरं तर, पाकिस्तान क्रिकेट बोर्ड या प्रकरणात आता एकटे पडले आहे. पाकिस्तानचा संघ आपले सर्व सामने श्रीलंकेत खेळणार आहे. आज नेदरलँड्सविरुद्धच्या सामन्यात पाकिस्तानच्या संघाने शेवटच्या षटकांमध्ये विजय मिळवला आहे. अशा परिस्थितीत त्यांचा संघही दबावाखाली असल्याचे दिसून येत आहे.