आयसीसी टी-२० वर्ल्ड कप २०२६ मध्ये सह-यजमान श्रीलंकेने विजयाने आपल्या मोहिमेची सुरुवात केली होती. आता श्रीलंकन संघ आपला दुसरा सामना गुरुवार, १२ फेब्रुवारी रोजी ओमानविरुद्ध खेळणार आहे. परंतु, या सामन्यापूर्वी श्रीलंका संघासाठी एक अत्यंत वाईट बातमी समोर आली आहे. संघाचा दिग्गज अष्टपैलू खेळाडू वानिंदु हसरंगा दुखापतीमुळे संपूर्ण स्पर्धेतून बाहेर झाला आहे. मात्र, श्रीलंका क्रिकेट बोर्डाने (SLC) अद्याप याची अधिकृत पुष्टी केलेली नाही.

​२८ वर्षीय वानिंदु हसरंगाने रविवारी कोलंबोमध्ये खेळल्या गेलेल्या टी-२० वर्ल्ड कप २०२६ मधील श्रीलंकेच्या पहिल्या सामन्यात संघाच्या विजयात महत्त्वाची भूमिका बजावली होती. या सामन्यात त्याने आयर्लंडविरुद्ध ४ षटकांत केवळ २५ धावा देऊन ३ बळी घेतले होते. मात्र, सामन्यादरम्यान तो प्रचंड वेदनेत दिसत होता आणि त्याला हॅमस्ट्रिंगच्या (स्नायूंच्या) समस्येचा सामना करावा लागला होता. याच दुखापतीमुळे आता त्याला टी-२० वर्ल्ड कपमधून बाहेर पडावे लागले आहे.

​’ईएसपीएन क्रिकइन्फो’च्या वृत्तानुसार, मंगळवारी झालेल्या एमआरआय (MRI) स्कॅनमध्ये हसरंगाच्या डाव्या हॅमस्ट्रिंगमध्ये गंभीर दुखापत असल्याचे समोर आले, त्यानंतर त्याला टी-२० वर्ल्ड कप २०२६ मधून बाहेर करण्यात आले आहे. हसरंगाचे वर्ल्ड कपमधून बाहेर होणे श्रीलंकेसाठी एका मोठ्या धक्क्यापेक्षा कमी नाही. तो श्रीलंकेसाठी टी-२० आंतरराष्ट्रीय क्रिकेटमध्ये सर्वाधिक विकेट घेणारा गोलंदाज आहे. त्याने श्रीलंकेसाठी आतापर्यंत ९४ टी-२० सामन्यांत १५४ विकेट्स घेतल्या आहेत.

​क्रिकइन्फोच्या माहितीनुसार, हसरंगाच्या जागी लेग-स्पिन बॉलिंग ऑलराउंडर दुषण हेमंता याचा श्रीलंकेच्या संघात समावेश केला जाऊ शकतो. हेमंथाने आतापर्यंत श्रीलंकेकडून ३ टी-२० आंतरराष्ट्रीय सामने खेळले असून त्यात ४ बळी घेतले आहेत. ३१ वर्षीय हेमंथाने आपला शेवटचा टी-२० आंतरराष्ट्रीय सामना सप्टेंबर २०२५ मध्ये झिम्बाब्वेविरुद्ध खेळला होता.