केंद्रीय रस्ते वाहतूक आणि महामार्ग मंत्री नितीन गडकरी यांनी मोठी घोषणा केली आहे. कोल्हापूर जिल्ह्यातील कागल शहरातून जाणाऱ्या राष्ट्रीय महामार्ग-48 (NH-48) वर 6-लेन एलिव्हेटेड कॉरिडॉरच्या (उन्नत मार्ग) बांधकामाला मंजुरी दिली आहे. यासाठी 357.99 कोटी रुपयांची तरतूद करण्यात आली आहे. दरम्यान नितीन गडकरी यांनी एलिव्हेटेड कॉरिडॉरला मंजुरी दिल्यानंतर मुख्यमंत्री देवेंद्र फडणवीस यांनी पीएम मोदी आणि केंद्रीय मंत्री नितीन गडकरी यांचे आभार मानले आहेत.

कागल शहराच्या हद्दीत महामार्गाच्या दोन्ही बाजूंना 3-लेन कॉंक्रीट सर्व्हिस रस्त्यासह हा 6-लेन एलिव्हेटेड कॉरिडॉर उभारण्यात येणार आहे. यामुळे महामार्गावरून जाणारी लांब अंतराची अवजड वाहतूक वरून (एलिव्हेटेड मार्गावरून) जाईल, तर स्थानिक वाहतूक खालच्या सर्व्हिस रोडवरून सुरळीतपणे सुरू राहणार आहे. NH-48 हा दिल्ली, मुंबई, पुणे, बेंगळुरू आणि चेन्नई यांसारख्या महानगरांना जोडणारा 'गोल्डन क्वाड्रिलॅटरल'चा मुख्य भाग आहे. कागलमध्ये प्रचंड वाहतूक कोंडी होत असल्याने प्रवाशांचा वेळ आणि इंधन वाया जात होते, त्यातून सुटका होईल.