सोलापूर: जिल्ह्यातील कुर्डूवाडीत भोंदूगिरी आणि फसवणूक प्रकरणात मोठी कारवाई करण्यात आली आहे. व्यवसायात भरभराटीचे आमिष दाखवून एका तरुणाची आर्थिक फसवणूक केल्याप्रकरणी भोंदू मनोहर भोसले आणि त्याचा साथीदार विशाल वाघमारे यांना अटक करण्यात आली आहे. या प्रकरणात दोघांना न्यायालयात हजर करण्यात आले असता माढा दिवाणी आणि फौजदारी न्यायालयाने त्यांना 3 दिवसांची पोलीस कोठडी सुनावली. या कारवाईमुळे परिसरात मोठी खळबळ उडाली आहे.

Manohar Bhosale News : दोन्ही बाजूंचा युक्तिवाद

मनोहर भोसले आणि विशाल वाघमारे यांच्या वतीने अॅड. सुभाष हल्याळकर यांनी युक्तिवाद केला. त्यांनी अटक बेकायदेशीर असल्याचा दावा करत गुन्ह्यातील कलमे 7 वर्षांखालील असल्याने नोटीस देऊन अटक करायला हवी होती, असा युक्तिवाद मांडला.

Solapur  Manohar Bhosale : सरकारी पक्षाची हरकत

सरकारी पक्षाच्या वतीने जिल्हा सरकारी वकील ऍड. प्रदिपसिंग राजपूत यांनी युक्तिवाद करत भोसले हा सराईत गुन्हेगार असल्याचे नमूद केले. तसेच त्याच्याविरोधात यापूर्वीही अनेक गुन्हे दाखल असल्याने पुढील तपासासाठी पोलीस कोठडी आवश्यक असल्याचे सांगितले.

Manohar Bhosale Police Custody : न्यायालयाचा निर्णय

दोन्ही बाजूंचा युक्तिवाद ऐकल्यानंतर न्यायाधीशांनी मनोहर भोसले आणि विशाल वाघमारे यांना 3 दिवसांची पोलीस कोठडी सुनावली. या निर्णयामुळे तपासाला गती मिळण्याची शक्यता आहे.

Fraud Baba Investigation : पुण्यातून अटक, तपास सुरू

या प्रकरणातील तक्रारींची दखल घेत पोलिसांनी तपास सुरू केला होता. पुण्यातील मांजरी परिसरातून मनोहर भोसलेला ताब्यात घेण्यात आले. त्याच्याविरोधात कुर्डूवाडी पोलीस ठाण्यात फसवणूक आणि जादूटोणा प्रकरणी गुन्हे दाखल आहेत.

Manohar Bhosale Ashram Controversy : 27 एकरातील आलिशान आश्रम चर्चेत

मनोहर भोसलेचा सोलापूरच्या करमाळा तालुक्यातील घोटी येथे 27 एकरात पसरलेला आलिशान आश्रम असल्याची माहिती समोर आली आहे. येथे दर अमावस्येला मोठ्या प्रमाणात लोकांची गर्दी होत असे. बाबाला भेटण्यासाठी 11 हजार रुपयांची फी घेतली जात असल्याचंही समोर आलं आहे.

या प्रकरणामुळे परिसरात संतापाची लाट उसळली असून अशा भोंदूगिरीविरोधात कठोर कारवाई करण्याची मागणी नागरिकांकडून केली जात आहे. सध्या या प्रकरणाचा पुढील तपास सुरू आहे.

Who Is Manohar Mama Bhosale : कोण आहे मनोहर मामा भोसले? 

• इंदापूर तालुक्यातील लासुर्णे गावातला मूळचा रहिवासी.


• डीएडच्या परीक्षेत नापास झाल्यानंतर आठवडा बाजारात सुके बोंबील विकून उदरनिर्वाह करत होता.


• एक दिवस तो अचानक गायब झाला आणि काही वर्षानंतर आपल्याला संत बाळूमामा प्रसन्न असून त्यांचा आशीर्वाद असल्याचा दावा केला. 


• करमाळा तालुक्यातील उंदरगाव परिसरात त्याने स्वतःचा मठ थाटला होता.


• साक्षात बाळूमामा येत असल्याचे ऐकल्यानंतर अमावस्या पौर्णिमेला त्याच्याकडे भक्ताची मोठी गर्दी होऊ लागली.


• अनेक मोठ्या नेत्यासोबत देखील मनोहर मामा याचे फोटो आहेत. 


• अनेक राजकीय नेते आणि कार्यकर्ते या मामाच्या सल्ल्यासाठी गर्दी करायचे अशी चर्चा आहे.


• या आधी त्याच्यावर महिलेवर अत्याचार केल्याप्रकरणात सोलापुरातील करमाळा पोलिसात गुन्हा दाखल आहे. 


• कर्करोग बरा करतो म्हणून आर्थिक फसवणूक केल्याप्रकरणी बारामतीत तर मणक्याचे आजार बरे करतो म्हणून फसवणूक केल्याप्रकरणी दौंड पोलिसांत गुन्हा नोंद आहे. 


• 2021 मध्ये 3 गुन्हे दाखल झाल्यानंतर देखील त्याने आपली भोंदूगिरी सुरूच ठेवली होती. 

ही बातमी वाचा:

• Manohar Mama Bhosale News: जामिनावर सुटलेल्या मनोहर मामाचे हादरवणारे कांड; त्याला फसवलं आणि बिंग फुटलं, नेमकं काय घडलं?