महाराष्ट्र दिनानिमित्त शुक्रवारी मुंबई शेअर बाजार (BSE) आणि राष्ट्रीय शेअर बाजार एनएसई (NSE) बंद राहणार आहेत. शेअर बाजाराला सुटी असल्याने शुक्रवारी १ मे रोजी कोणताही व्यवहार होणार नाही. दोन्ही एक्सचेंजेसच्या इक्विटी, डेरिव्हेटिव्ह्ज, सिक्युरिटीज लेंडिंग अँड बॉरोइंग (SLB) आणि इलेक्ट्रॉनिक गोल्ड रिसीट्स (EGR) या विभागांमध्ये व्यवहार उपलब्ध नसतील.

मे महिन्यात शेअर बाजाराला दोन सुट्ट्या आहेत. 1 मे रोजी पहिली सुटी असल्याने दुसरी सुटी बकरीदनिमित्त गुरुवारी २८ मे रोजी असेल. त्या दिवशी बीएसई (BSE) आणि एनएसई (NSE) बंद राहतील. कमोडिटी एक्सचेंज एमसीएक्स (MCX) वर १ मे रोजी सकाळच्या सत्रात व्यवहार होणार नाहीत. तर दुसऱ्या सत्रात व्यवहार होणार आहे.

एप्रिल महिन्यात शेअर बाजारात रिकव्हरी दिसून आली. या महिन्यात सेन्सेक्स आणि निफ्टीमध्ये जवळपास ५% रिकव्हरी झाली. बँक निफ्टीमध्ये ६% पेक्षा जास्त रिकव्हरी झाली. महिनाभर शेअर बाजारात लक्षणीय अस्थिरता असली तरी, एप्रिल महिना मार्चपेक्षा चांगला होता.

२८ फेब्रुवारी रोजी अमेरिका-इराण युद्ध सुरू झाल्यानंतर शेअर बाजारात मोठी घसरण झाली. याचा परिणाम मार्चमध्ये जगभरातील बाजारांवर झाला. या संघर्षामुळे कच्च्या तेलाच्या किमतीत मोठी वाढ झाली. मार्चमध्ये, ब्रेंट क्रूड तेलाची किंमत एका क्षणी प्रति बॅरल ११८ डॉलरवर पोहोचली होती. त्यानंतर त्यात घट झाली. असे असूनही, मार्च महिन्याच्या बहुतेक काळात ते प्रति बॅरल 100 डॉलरच्या वर राहिले.

३० एप्रिल रोजी शेअर बाजारात मोठी घसरण झाली. दुपारी १२:४० वाजता, निफ्टी १.१३% किंवा २७३ अंकांनी घसरून २३,९०६ वर होता. सेन्सेक्स १.०७% किंवा ८२८ अंकांनी घसरून ७६,६७४ वर होता. बँक निफ्टी १.२३% किंवा ६७६ अंकांनी घसरून ५४,७१९ वर होता. कच्च्या तेलाच्या किमती पुन्हा वाढल्या असून, त्याचा परिणाम शेअर बाजारावर झाला आहे. २९ एप्रिल रोजी कच्च्या तेलाने पुन्हा $120 चा टप्पा ओलांडला होता. तथापि, आता ते प्रति बॅरल $111 पर्यंत घसरले आहे.