मुंबई : मार्च तिमाही निकालांनंतर स्टेट बँक ऑफ इंडिया (एसबीआय) वर ब्रोकरेज कंपन्यांनी त्यांचे मूल्यांकन प्रसिद्ध करण्यास सुरुवात केली आहे. एसबीआयवरील आपल्या नवीन अहवालात जागतिक ब्रोकरेज फर्म बर्नस्टाईनने बँकेच्या दीर्घकालीन वाढीच्या शक्यतांवर विश्वास व्यक्त करत शेअर्सवरील आपले आउटपरफॉर्म रेटिंग कायम ठेवले आहे. ब्रोकरेजने शेअर्ससाठी १,३०० रुपयांची लक्ष्य किंमत निश्चित केली आहे. मॉर्गन स्टॅनले आणि सिटी यांसारख्या इतर ब्रोकरेज कंपन्यांनीही एसबीआयवर अहवाल प्रसिद्ध केले आहेत.




बर्नस्टाईनचे मत

ब्रोकरेजच्या मते, चौथ्या तिमाहीत एसबीआयची कामगिरी संमिश्र होती. बँकेचे निव्वळ व्याज उत्पन्न (NII) अपेक्षेपेक्षा किंचित कमी होते. तरीही कमी तरतुदींमुळे (प्रोव्हिजनिंगमुळे) नफ्यावरील मोठा दबाव कमी झाला. अहवालात म्हटले की, बँकेचे निव्वळ व्याज मार्जिन (NIM) तिमाहीत १८ बेसिस पॉइंट्सने घसरून २.९३ टक्क्यांवर आले, जी मोठ्या बँकांमधील सर्वात मोठी घसरण आहे. मार्जिनवरील दबावाची मुख्य कारणे म्हणजे बाह्य बेंचमार्क आधारित कर्ज दर (EBLR), MCLR आणि ट्रेझरी बिलांशी जोडलेल्या कॉर्पोरेट कर्जांमध्ये झालेली घट. व्याजदरांमधील बदलामुळे बँकेच्या कमाईवर परिणाम झाला आणि मार्जिन कमी झाले. मात्र, ब्रोकरेजने असेही म्हटले आहे की हा दबाव तात्पुरता असू शकतो आणि भविष्यात परिस्थितीत सुधारणा होऊ शकते.



अहवालात म्हटले आहे की बँकेची कर्जवाढ मजबूत राहिली आहे. एसएमई, कृषी आणि कॉर्पोरेट क्षेत्रातील मजबूत मागणीमुळे कर्ज वितरणात वार्षिक १७% वाढ झाली आहे. यावरून हे स्पष्ट होते की एसबीआयची पतवाढ मजबूत आहे आणि बँक अर्थव्यवस्थेच्या विविध क्षेत्रांमध्ये आपले अस्तित्व टिकवून आहे. बँकेची CET1 स्थिती आणि एकूण मालमत्तेची गुणवत्ता स्थिर दिसत आहे, जे गुंतवणूकदारांसाठी एक सकारात्मक चिन्ह आहे.




मॉर्गन स्टॅनलेचे मत

जागतिक ब्रोकरेज फर्म मॉर्गन स्टॅनलेने एसबीआयवर 'इक्वल-वेट' रेटिंग कायम ठेवले आहे आणि ची लक्ष्य किंमत ९८० रुपयांवरून १,००० रुपयांपर्यंत वाढवली आहे. ब्रोकरेजच्या मते, बँकेचे मुख्य निकाल अपेक्षेपेक्षा चांगले होते, परंतु निव्वळ व्याज उत्पन्न (NII) आणि निव्वळ व्याज मार्जिन (NIM) मधील कमकुवतपणामुळे सकारात्मक परिणाम मर्यादित राहिला. अहवालात म्हटले आहे की, तिमाही आधारावर एनआयएम (NIM) १८ बेसिस पॉइंट्सने घसरला, जो अपेक्षेपेक्षा १६ बेसिस पॉइंट्सने कमी होता. हे प्रामुख्याने ट्रेझरी बिलांशी जोडलेल्या कॉर्पोरेट कर्जांच्या वाट्यात वाढ आणि उत्पन्नातील घसरणीमुळे झाले.



मॉर्गन स्टॅनलेने आर्थिक वर्ष २०२७ आणि २०२८ साठी एसबीआयच्या एनआयएम (NIM) अंदाजात २० पेक्षा जास्त बेसिस पॉइंट्सची कपात केली आहे. ईपीएस (EPS) अंदाजातही आर्थिक वर्ष २०२७ आणि २०२८ साठी अनुक्रमे ४% आणि २% ने कपात करण्यात आली आहे. मात्र, ब्रोकरेज फर्मचा विश्वास आहे की भविष्यात मार्जिनमध्ये काही प्रमाणात सुधारणा होऊ शकते. परंतु सातत्य राखणे हे एक आव्हान आहे.




ब्रोकरेज फर्म सिटी

सिटीग्रुपची ब्रोकरेज शाखा असलेल्या सिटीने एसबीआयवर खरेदी रेटिंग कायम ठेवले आहे आणि लक्ष्य किंमत १,२६५ रुपयांवरून १,२३० रुपयांपर्यंत कमी केली आहे. अहवालानुसार, एनआयएममधील मोठी घट आणि कमी फी उत्पन्नामुळे चौथ्या तिमाहीच्या निकालांवर सर्वाधिक परिणाम झाला. ब्रोकरेज फर्मने म्हटले आहे की, फ्लोटिंग रेट लोन मिक्समधील वाढ, तसेच ईबीएलआर (EBLR) आणि एमसीएलआर (MCLR) च्या पुनर्मूल्यांकनामुळे एनआयएममध्ये १८ बेसिस पॉइंट्सची घट झाली. मात्र, असे असूनही, बँकेची कर्जवाढ मजबूत राहिली, जी वार्षिक सुमारे १७% ने वाढली. सिटीच्या मते, ही वाढ विविध व्यवसाय विभागांमध्ये मजबूत मागणी दर्शवते.वाढलेल्या थकीत कर्जांनंतरही, क्रेडिट खर्च नियंत्रणात राहिला, ही बँकेसाठी दिलासादायक बाब आहे.




शेअरची कामगिरी

एसबीआयचे शेअर्स सोमवार ११ मे रोजी घसरून ९७७.३० रुपयांवर आहे. महिन्याभरात हा शेअर २% आणि तीन महिन्यांच्या कालावधीत ११% ने घसरला. मात्र शेअरने वर्षभरात २७% पेक्षा जास्त परतावा दिला. कंपनीचे बाजार भांडवल ९,४१,१०८ कोटी रुपये आहे. शेअर ५२ आठवड्यांच्या उच्चांकापेक्षा (१,२३४ रुपये) खाली व्यवहार करत आहे.