• देशभरात २४ तासांचा केमिस्ट संप पुकारला




• ऑनलाइन औषध विक्री आणि सवलतींविरोधात आंदोलन




• महाराष्ट्रासह अनेक राज्यांत दुकाने सुरू राहणार असल्याने दिलासा




• काही भागांत आरोग्य सेवांवर मर्यादित परिणाम संभव

देशभरातील औषध विक्रेत्यांनी आज ऑनलाइन औषध विक्रीविरोधात आवाज उठवत २४ तासांच्या संपाचे आवाहन केले असून, या संपाचा आरोग्य व्यवस्थेवर किती परिणाम होणार याकडे सर्वांचे लक्ष लागले आहे. ‘ऑल इंडिया ऑर्गनायझेशन ऑफ केमिस्ट्स अँड ड्रगिस्ट्स’ (AIOCD) या संघटनेच्या नेतृत्वाखाली हा संप पुकारण्यात आला आहे. संघटनेच्या दाव्यानुसार, देशभरातील सुमारे १५ लाखांहून अधिक केमिस्ट आणि औषध विक्रेते या आंदोलनात सहभागी होत आपली दुकाने बंद ठेवणार आहेत.

या संपामागील मुख्य कारण म्हणजे ई-फार्मसी प्लॅटफॉर्म्सद्वारे दिल्या जाणाऱ्या मोठ्या सवलती आणि ऑनलाइन औषध विक्रीवरील नियंत्रणाचा अभाव. AIOCD च्या मते, अनियंत्रित ऑनलाइन विक्रीमुळे पारंपरिक औषध दुकानदारांच्या व्यवसायावर मोठा परिणाम होत आहे. त्याचबरोबर, डॉक्टरांच्या प्रिस्क्रिप्शनशिवाय औषधे उपलब्ध होण्याची शक्यता वाढल्याने रुग्णांच्या सुरक्षिततेलाही धोका निर्माण होऊ शकतो, अशी भीती संघटनेने व्यक्त केली आहे.

LPG Gas Booking : सिलेंडरच्या बुकिंगचा मेसेज आलाय, पण DAC कोड खरा आहे की खोटा? कसं ओळखाल?

मात्र, या संपाबाबत देशभरात एकसमान प्रतिसाद दिसून येत नाही. ‘केंद्रीय औषध मानक नियंत्रण संस्था’ (CDSCO) यांनी दिलेल्या माहितीनुसार, अनेक राज्यांतील औषध विक्रेता संघटनांनी या संपापासून दूर राहण्याचा निर्णय घेतला आहे. महाराष्ट्र, कर्नाटक, उत्तर प्रदेश, पश्चिम बंगाल, केरळ, पंजाब, हरियाणा, गुजरात, छत्तीसगड, सिक्कीम, उत्तराखंड आणि लडाख या राज्यांतील संघटनांनी लेखी आश्वासन देत औषध दुकाने सुरू ठेवण्याचे स्पष्ट केले आहे. त्यामुळे सर्वसामान्य नागरिकांना औषधांचा तुटवडा भासणार नाही, अशी शक्यता व्यक्त केली जात आहे.

Shocking : धक्कादायक! हॉटेलच्या बंद खोलीत तरुणी आणि पुरुष नको त्या अवस्थेत, पोलिसांनी छापा टाकताच भयंकर सत्य आलं समोर

दरम्यान, रुग्णांची गैरसोय टाळण्यासाठी आपत्कालीन औषधांचा पुरवठा सुरळीत ठेवण्यासाठी विशेष उपाययोजना करण्यात आल्याचेही सांगण्यात आले आहे. तरीही, कर्नाटकातील काही भाग आणि मध्य प्रदेशमध्ये या संपाचा अधिक परिणाम जाणवू शकतो, अशी शक्यता वर्तवली जात आहे. एकीकडे ऑनलाइन औषध विक्रीमुळे ग्राहकांना सवलती आणि सोयी मिळत असल्या, तरी दुसरीकडे औषधांच्या सुरक्षिततेचा मुद्दा पुन्हा ऐरणीवर आला आहे.