Hardik Pandya: हार्दिक पांड्या मुंबई इंडियन्स सोडणार असल्याच्या चर्चा आहेत. आयपीएल सूत्रांच्या हवाल्याने पीटीआय या वृत्तसंस्थेने दिलेल्या वृत्तानुसार, संघ प्लेऑफच्या शर्यतीतून बाहेर पडताच पांड्याने व्यवस्थापनाला आपल्या निर्णयाबद्दल कळवलं आहे. वरिष्ठ खेळाडूंशी असलेले मतभेद हे त्याने आपल्या निर्णयाचे कारण सांगितले. या 32 वर्षीय अष्टपैलू खेळाडूने मोसमाच्या मध्यात मुंबई संघ व्यवस्थापनाला कळवले होते की, संघाची खराब कामगिरी आणि वरिष्ठ खेळाडूंशी असलेल्या मतभेदांमुळे तो तणावाखाली होता. पांड्या आणि मुंबई इंडियन्स यांच्यात विभक्त होण्याबाबत एकमत झाले आहे. या आयपीएल मोसमात मुंबई संघ नवव्या स्थानावर राहिला.

सलग तिसऱ्या मोसमात मुंबई सोडणार असल्याची चर्चा

पांड्या मुंबई इंडियन्स सोडणार असल्याची बातमी समोर येण्याची ही पहिली वेळ नाही. पांड्या 2015 ते 2021 पर्यंत मुंबई इंडियन्सकडून खेळला. त्यानंतर त्याने संघ सोडला आणि दोन वर्षे (2022 आणि 2023) गुजरात टायटन्सचे कर्णधारपद भूषवले. तो 2024 मध्ये मुंबईत परतला आणि रोहित शर्माच्या जागी त्याची कर्णधार म्हणून नियुक्ती करण्यात आली. 2024 मध्ये मुंबई संघ दहाव्या आणि शेवटच्या स्थानावर राहिला. 2025 मध्ये संघ प्लेऑफमध्ये पोहोचला, पण विजेतेपद पटकावण्यात अपयशी ठरला. या दोन हंगामांदरम्यान आणि त्यानंतर, पांड्या मुंबई सोडून जाईल किंवा त्याच्याकडून कर्णधारपद काढून घेतले जाईल, अशी चर्चा रंगली होती. 

चाहत्यांनी सातत्याने विरोध केला 

2024 मध्ये हार्दिक पांड्या मुंबईचा कर्णधार म्हणून संघात परतला. यापूर्वी त्याने दोन वर्षे गुजरातचे कर्णधारपद भूषवले होते. मुंबईने रोहित शर्माच्या जागी हार्दिकला कर्णधार म्हणून नियुक्त केले होते. या निर्णयामुळे एमआयचे चाहते नाराज झाले होते. पहिल्या वर्षी (२०२४) मैदानावर हार्दिकला मोठ्या प्रमाणात छपरी म्हणत हुर्रे करण्यात आले होते आणि चालू हंगामातही गोष्टी अपेक्षेप्रमाणे घडल्या नाहीत. सलग दोन हंगामांपासून चाहत्यांच्या रोषाला सामोरे जाऊनही, हार्दिकने सातत्याने म्हटले आहे की हा प्रवास कठीण पण आनंददायी होता. तथापि, आता त्याने संघापासून वेगळे होण्याचा निर्णय घेतला आहे.

पाठीची दुखापत आणि मानसिक थकवा ही कारणे  

एका आयपीएल सूत्राने पीटीआयला सांगितले, "हार्दिक मानसिक तणावाखाली होता आणि पूर्णपणे थकून गेला होता. त्याला पाठीची दुखापतही झाली होती. प्लेऑफच्या आशा संपुष्टात येताच, हार्दिकने संघाच्या निर्णयकर्त्यांना कळवले की तो आता संघात राहणार नाही." सूत्राने पुढे सांगितले की, गेली तीन वर्षे त्याच्यासाठी सोपी नव्हती, कारण एका तरुण खेळाडूला इतके सहन करावे लागते.

ड्रेसिंग रूममधील वरिष्ठ खेळाडूंशी मतभेद

2021 मध्ये हार्दिकने सोडलेली मुंबई इंडियन्सची ड्रेसिंग रूम, 2024 मध्ये तो परतला तेव्हा तशीच राहिली नव्हती. संघातील सर्व वरिष्ठ खेळाडूंचे एकमत नव्हते. मतभेद असूनही निकाल चांगले लागले असते, तर ते निराशाजनक ठरले नसते. 

• Lalit Modi on Sanjiv Goenka: 'संजीव गोयंकासारख्या लोकांमुळे आता आयपीएलच्या फक्त मैदानातच नव्हे, तर...' रिषभ पंतचा राजीनामा पडताच ललित मोदी भलताच पेटला