आयपीएल 2026 मध्ये राजस्थान रॉयल्सचा युवा आणि स्फोटक फलंदाज वैभव सूर्यवंशीने (Vaibhav Suryavanshi) आपल्या धमाकेदार फलंदाजीने खळबळ उडवून दिली आहे. केवळ 15 वर्षांचा असताना वैभवने आयपीएलमध्ये असे अनेक मोठे विक्रम केले आहेत, जे अनेक दिग्गज खेळाडूंनाही जमलेले नाहीत. या हंगामात त्याचा फॉर्म खूप चांगला असून त्याने जसप्रीत बुमराह आणि जोश हेजलवुड सारख्या जगातील घातक गोलंदाजांविरुद्धही आक्रमक फलंदाजी करून सर्वांना थक्क केले आहे.

वैभवने या मोसमात आतापर्यंत 65 षटकार ठोकले आहेत आणि आपल्या आक्रमक खेळीच्या जोरावर राजस्थानला अंतिम फेरीच्या (फायनलच्या) उंबरठ्यावर नेऊन ठेवले आहे. इतकी निर्भय फलंदाजी करण्यामागचे गुपित स्वतः वैभवनेच सांगितले आहे. त्याने एक मोठा खुलासा केला आहे की, त्याच्या आयुष्यात एक अशी गोष्ट आहे, जिच्याशिवाय तो एक दिवसही राहू शकत नाही.

बिहारमधील समस्तीपूरचा रहिवासी असलेला वैभव सूर्यवंशी आता संपूर्ण क्रिकेट विश्वात चर्चेत असून तो एक सुपरस्टार बनला आहे. इथपर्यंत पोहोचण्यासाठी त्याने खूप मेहनत घेतली आहे. आपल्या यशाचे श्रेय तो वडील संजीव सूर्यवंशी यांना देतो, जे त्याला समस्तीपूरवरून पाटण्याला सरावासाठी (प्रॅक्टिस) घेऊन जात असत. वैभवने सांगितले की, जर त्याने एक दिवसही सराव केला नाही, तर त्याला वाटते की त्याचे आयुष्य जणू थांबले आहे किंवा मंदावले आहे.

‘जियोहॉटस्टार’शी बोलताना वैभव म्हणाला, आज मी जो काही आहे, तो माझ्या वडिलांमुळेच आहे. लहानपणापासून त्यांनी माझ्याकडून इतका सराव करून घेतला आहे की, जर मी एक दिवसही सराव केला नाही तर मला वाटते की माझे आयुष्य मंदावले आहे. म्हणूनच मी जास्त सुट्ट्या घेत नाही, फक्त एक दिवसाचा आराम माझ्यासाठी पुरेसा असतो. क्रिकेटप्रती वैभवचे वेड इतके आहे की, आयपीएलच्या तयारीसाठी त्याने आपल्या 10 वीच्या परीक्षाही सोडल्या होत्या.

तो म्हणाला, मला वाटले की मला सराव करणे गरजेचे आहे, कारण आयपीएल जवळ आली होती. मी अंडर-19 वर्ल्ड कपवरून परतत होतो आणि फॉरमॅटही बदलत होता. अशा वेळी मला माझ्या फलंदाजीवर खूप काम करायचे होते.

एलिमिनेटर सामन्यात सनरायझर्स हैदराबादविरुद्ध वैभवने केवळ 29 चेंडूत 97 धावांची तुफानी खेळी करून राजस्थान रॉयल्सला क्वालिफायर-2 मध्ये पोहोचवले. त्याच्या या खेळीने संपूर्ण क्रिकेट जगताला चकित केले आहे. आता दुसऱ्या क्वालिफायरमध्ये राजस्थानचा सामना गुजरात टायटन्सशी होणार असून सर्वांच्या नजरा पुन्हा एकदा वैभव सूर्यवंशीवर खिळल्या आहेत. विशेष म्हणजे, एलिमिनेटर सामन्यात त्याच्याकडे आयपीएल इतिहासातील सर्वात जलद शतक करण्याचा सुवर्णसंधी होती.