मुंबई: डिजिटल पेमेंट क्षेत्रातील नामांकित फिनटेक कंपनी 'रेझरपे' (Razorpay) लवकरच आपला (IPO) बाजारात आणण्याच्या तयारीत आहे. यासाठी कंपनीने बाजार नियामक संस्था ' सेबी 'कडे ( SEBI ) गोपनीय पद्धतीने आपला प्राथमिक मसुदा सुपूर्द केला आहे. प्राप्त माहितीनुसार, रेझरपे या आयपीओच्या माध्यमातून तब्बल ५,००० ते ६,००० कोटी रुपयांचे भांडवल उभे करण्याची शक्यता आहे. कंपनीने सोमवारी एका जाहीर नोटीसद्वारे स्टॉक एक्स्चेंज आणि सेबीकडे कागदपत्रे सादर केल्याच्या वृत्ताला दुजोरा दिला आहे.



२०१४ मध्ये झाली होती सुरुवातआयटी क्षेत्रातील तरुण उद्योजक हर्षिल माथूर आणि शशांक कुमार यांनी २०१४ मध्ये 'रेझरपे' या स्टार्टअपची स्थापना केली होती. सुरुवातीला केवळ ऑनलाईन पेमेंट स्वीकारणारी सेवा म्हणून सुरू झालेल्या या कंपनीने अल्पावधीतच मोठी प्रगती केली. आज ही कंपनी व्यवसायांना पेमेंट स्वीकारण्यासोबतच बँकिंग सेवा, पगाराचे व्यवस्थापन (Payroll), व्यवसाय कर्ज आणि इतर अनेक अत्याधुनिक आर्थिक सेवा एकाच प्लॅटफॉर्मवर पुरवते.



आयपीओची तारीख लवकर समोर येणारदरम्यान, रेझरपेचे जाळे देशभरात पसरले असून, लाखो छोटे-मोठे उद्योग, स्टार्टअप्स, आणि मोठ्या कॉर्पोरेट कंपन्या त्यांच्या सेवांचा वापर करतात. व्यवसायातील उत्कृष्ट कामगिरीमुळे २०२० मध्ये या कंपनीने १ अब्ज डॉलर्सपेक्षा जास्त मूल्यांकन असलेली 'युनिकॉर्न' कंपनी होण्याचा बहुमान मिळवला. केवळ पेमेंट गेटवेपुरते मर्यादित न राहता कंपनीने स्वतःची एक मोठी आर्थिक परिसंस्था तयार केली आहे. दरम्यान, या आयपीओचा निश्चित आकार, कंपनीचे एकूण मूल्य आणि ही सेबीच्या मंजुरीनंतर आणि बाजारातील परिस्थिती पाहून ठरवली जाईल.



विशेष म्हणजे, रेझरपेने ही कागदपत्रे 'गोपनीय फायलिंग' प्रक्रियेअंतर्गत सादर केली आहेत. या नियमामुळे कंपन्यांना आपल्या व्यवसायाची गुप्त माहिती लगेच जाहीर न करता थेट सेबीकडे तपासणीसाठी पाठवता येते. सध्या जागतिक पातळीवर आणि विशेषतः पश्चिम आशियात सुरू असलेल्या तणावामुळे रेझरपेची प्रतिस्पर्धी कंपनी 'फोनपे'ने (PhonePe) आपला आयपीओ तूर्तास पुढे ढकलला आहे. अशा आव्हानात्मक वातावरणातही रेझरपेने आयपीओसाठी टाकलेले हे पाऊल भारतीय बाजारपेठेसाठी अत्यंत महत्त्वाचे मानले जात आहे.



रेझरपे कंपनीविषयी माहिती'रेझरपे' ही भारतातील एक अग्रगण्य आणि नामांकित फिनटेक (Fintech) कंपनी आहे, जिची स्थापना २०१४ मध्ये हर्षिल माथूर आणि शशांक कुमार यांनी केली. ही कंपनी प्रामुख्याने ऑनलाईन पेमेंट गेटवे सेवा पुरवते, ज्याद्वारे लहान-मोठे उद्योग, स्टार्टअप्स आणि कॉर्पोरेट कंपन्यांना डिजिटल पेमेंट स्वीकारणे सोपे जाते. ही कंपनी पेमेंट गेटवेव्यतिरिक्त, रेझरपे व्यवसायांसाठी बँकिंग, पेरोल, बिझनेस लोन आणि इतर आर्थिक सेवा एकाच प्लॅटफॉर्मवर उपलब्ध करून देते.



शेअर बाजारात आयपीओची चलतीसध्या भारतीय शेअर बाजारात आयपीओ आणणाऱ्या कंपन्यांना गुंतवणूकदारांकडून मोठा प्रतिसाद मिळत आहे. नुकतेच १० जून रोजी 'सीएमआर ग्रीन टेक्नॉलॉजीज' या धातू क्षेत्रातील कंपनीचे शेअर्स बाजारात सूचीबद्ध झाले. या कंपनीच्या शेअरची किंमत थेट २७५. ४० रुपयांवर खुली झाली, जी मूळ किमतीपेक्षा तब्बल ४३. ४३ टक्के जास्त होती. बाजारातील हाच सकारात्मक कल पाहता, रेझरपेच्या आगामी आयपीओबाबतही गुंतवणूकदारांमध्ये आतापासूनच मोठी उत्सुकता निर्माण झाली आहे.



(
Disclaimer - या बातमीमध्ये दिलेली माहिती केवळ वाचकांच्या माहितीसाठी आणि शैक्षणिक उद्देशाने प्रसिद्ध करण्यात आली आहे. हा कोणत्याही प्रकारचा प्रत्यक्ष शेअर खरेदी-विक्रीचा किंवा गुंतवणुकीचा सल्ला नाही. शेअर बाजारातील गुंतवणूक ही बाजाराच्या जोखमींच्या अधीन असते. कोणताही आर्थिक निर्णय घेण्यापूर्वी किंवा कोणत्याही शेअर्समध्ये गुंतवणूक करण्यापूर्वी आपल्या नोंदणीकृत वित्तीय सल्लागाराचा सल्ला नक्की घ्या. )