► वृत्तसंस्था नवी दिल्ली
वरिष्ठ भारतीय पोलीस सेवा (आयपीएस) अधिकारी महेश दीक्षित यांची गुरुवारी इंटेलिजन्स ब्युरोच्या नव्या संचालकपदी नियुक्ती करण्यात आली. त्यांनी विद्यमान संचालक, तपन कुमार डेका यांच्याकडून पदभार स्वीकारला आहे. पंतप्रधान नरेंद्र मोदी यांच्या अध्यक्षतेखालील मंत्रिमंडळाच्या नियुक्ती समितीने महेश दीक्षित यांच्या नियुक्तीला मंजुरी दिली. महेश दीक्षित हे आंध्र प्रदेश केडरचे 1993 बॅचचे आयपीएस अधिकारी आहेत. त्यांची आयबी प्रमुखपदी दोन वर्षांच्या कालावधीसाठी किंवा पुढील आदेशापर्यंत नियुक्ती करण्यात आली आहे.

महेश दीक्षित हे सध्या इंटेलिजन्स ब्युरोमध्ये विशेष संचालक म्हणून कार्यरत होते. आता त्यांनी हिमाचल प्रदेश केडरचे 1988 बॅचचे आयपीएस अधिकारी तपन कुमार डेका यांची जागा घेत संचालकपद प्राप्त केले आहे. दीक्षित हे यापूर्वी इंटेलिजन्स ब्युरोमध्ये कार्यरत असल्यामुळे त्यांना या संस्थेतील सर्वात अनुभवी अधिकाऱ्यांपैकी एक मानले जाते. त्यांना दहशतवादविरोधी कारवायांचा व्यापक अनुभव असून त्यांनी इंटेलिजन्स ब्युरोमध्ये अनेक महत्त्वाच्या जबाबदाऱ्या सांभाळल्या आहेत.
दहशतवादविरोधी व गुप्तचर कारवायांचा अनुभव
महेश दीक्षित यांच्या कारकिर्दीचा बहुतांश सेवाकाळ जम्मू काश्मीरमध्ये गेला. त्याठिकाणी त्यांनी श्रीनगरमधील इंटेलिजन्स ब्युरोची उपशाखा असलेल्या इंटेलिजन्स ब्युरोचे नेतृत्व केले. या काळात त्यांनी जम्मू, काश्मीर आणि लडाखमधील गुप्तचर कारवायांवर देखरेख केली. तसेच सर्वात महत्त्वाचे म्हणजे 2019 मध्ये कलम 370 रद्द केल्यानंतर सुरक्षा परिस्थितीवर लक्ष ठेवण्यात महत्त्वाची भूमिका बजावली. त्यांनी पाकिस्तान-समर्थित घुसखोरी नेटवर्क, कट्टरतावादाच्या कारवाया आणि डाव्या विचारसरणीच्या अतिरेकी गटांकडून निर्माण होणाऱ्या धोक्यांचा सामना करण्यासाठी काम केले आहे.

इंटेलिजन्स ब्युरो ही गृह मंत्रालयाच्या अंतर्गत कार्यरत असलेली भारताची प्रमुख अंतर्गत सुरक्षा आणि गुप्तचर संस्था आहे. ही जगातील सर्वात जुन्या गुप्तचर संस्थांपैकी एक मानली जाते. देशांतर्गत गुप्त माहिती गोळा करणे, दहशतवादाचा मुकाबला करणे आणि महत्त्वपूर्ण पायाभूत सुविधांची सुरक्षा सुनिश्चित करणे असे ‘आयबी’चे कार्यक्षेत्र आहे.