हिंदुस्थान आणि जपान यांच्या बहुप्रतिक्षीत असा एकमेव टी-20 आंतरराष्ट्रीय सामना अत्यंत रोमहर्षक ठरला. हवामानाने दगा दिल्यामुळे सामना निर्धारित वेळेत सुरू झाला नाही. त्यामुळे चाहत्यांचा भ्रमनिरास झाला. जवळपास तीन तास उशिराने सामना सुरू झाला आणि तोही फक्त 5-5 षटकांचा. मात्र, हा 5-5 षटकांचा सामनाही शेवटच्या चेंडुपर्यंत गेला.

प्रथम फलंदाजी करताना टीम इंडिया निर्धारित 5 षटकांत केवळ 32 धावांपर्यंत मजल मारू शकला, कारण अभिषेक शर्मा, संजू सॅमसन आणि इशान किशन यांसारखे प्रमुख फलंदाज लवकर बाद झाले. टीम इंडियाने दिलेल्या 33 धावांच्या माफक लक्ष्याचा पाठलाग करण्यासाठी उतरलेल्या जपानच्या संघाविरुद्ध हिंदुस्थानच्या गोलंदाजांनी चमकदार कामगिरी करत सामन्यात पुनरागमन केले. अक्षर पटेल आणि वॉश्टिंगन सुंदर यांनी सुरुवातीच्या षटकांत प्रभावी गोलंदाजी करत महत्त्वाचे गडी बाद केले, ज्यामुळे जपानच्या संघावर सुरुवातीपासूनच दबाव निर्माण झाला.

जपानी फलंदाजांनी कडवी झुंज देत सामन्यावर पकड निर्माण करण्याचा प्रयत्न केला. शेवटच्या षटकात जपानला विजयासाठी आठ धावांची गरज असताना सामन्यात मोठा थरार पाहायला मिळाला. वाइड चेंडूवरून काही वेळ वादही झाला, परंतु अक्षर पटेलने अत्यंत संयमी गोलंदाजी करत शेवटच्या चेंडूंवर अचूक नियंत्रण राखले. जपानला 5 षटकांत 30 धावांपर्यंतच मजल मारता आली आणि हिंदुस्थानने हा ऐतिहासिक सामना दोन धावांनी जिंकून आपल्या नावावर केला.