नवी दिल्ली. मध्य प्रदेशची राजधानी भोपाळमधून एक खळबळजनक घटना समोर आली आहे. छोला मंदिर पोलीस ठाण्याच्या हद्दीतील माळीखेडी येथे राहत्या घरात घरातील चौघांची गळा चिरून हत्या करण्यात आली. कुटुंबप्रमुखाचा मृतदेह रेल्वे रुळावर आढळून आला. कुटुंबप्रमुखाने आधी आई, पत्नी, अल्पवयीन मुलगी आणि मुलाची हत्या केली आणि नंतर रेल्वेसमोर येऊन आत्महत्या केल्याचे समजते. नरेंद्र साहू (35), त्यांची आई सरस्वती साहू (50), पत्नी सोमलता साहू (29), मुलगी क्रिती साहू (10) आणि मुलगा खुश साहू (6) अशी मृतांची नावे आहेत.

नरेंद्र साहू यांचा मृतदेह सुखी सेवानिया पोलीस स्टेशन हद्दीतील चोपडा कलान येथे रेल्वे रुळावर आढळून आला. तर सरस्वती साहू, सोमलता साहू, क्रिती आणि खुश यांचे मृतदेह घरात आढळून आले. पोलिसांनी सर्व मृतदेह पोस्टमार्टमसाठी पाठवले आहेत. कुटुंबाबाबत माहिती गोळा करण्यासाठी पोलीस आसपासच्या लोकांची चौकशी करत आहेत. या घटनेनंतर परिसरातील नागरिक आश्चर्य व्यक्त करत आहेत. पोलीस मृतांच्या कुटुंबीयांकडूनही माहिती गोळा करत आहेत.

फॉरेन्सिक टीम घटनास्थळी पोहोचली आणि काही महत्त्वाचे पुरावे गोळा केले. मृतदेह सापडलेल्या घरात सर्वत्र रक्ताचे लोट पसरले होते. कुटुंबीय झोपले असताना नरेंद्रने ही घटना घडवली असावी, असा अंदाज वर्तवला जात आहे. नरेंद्र साहू यांच्याकडे केटरिंगचे काम होते. यापूर्वी त्यांचे एक रेस्टॉरंटही होते पण नंतर ते बंद करण्यात आले. प्राथमिक माहितीनुसार, नरेंद्र आर्थिक संकटाशी झुंजत होता. बहुधा त्याने कोणाकडून कर्ज घेतले असावे व ते फेडता येत नसल्यामुळे सावकाराकडून त्याच्यावर दबाव टाकला जात होता व त्यामुळेच त्याने कुटुंबीयांची हत्या करून आत्महत्या केली. पोलीस या प्रकरणाचा वेगवेगळ्या कोनातून तपास करत आहेत.