केरळमधील अभयारण्य येथे असलेल्या 'माया' नावाच्या अवघ्या १८ महिन्यांच्या गंभीर आजारी अनाथ हत्तीच्या पिल्लाला उपचारांसाठी विमानाने अनंत अंबानी यांच्या जामनगर येथील 'वनतारा'मध्ये आणण्यात आले आहे. जुलै महिन्यात उंचावरून पडल्यामुळे मायाला गंभीर दुखापत झाली होती. तेव्हापासून तिला स्वतःच्या पायावर उभे राहणेही शक्य होत नव्हते. तिची प्रकृती दिवसेंदिवस खालावत असल्याने तिला इच्छामरण देण्याची शिफारस करण्यात आली होती. मात्र, शेवटचा प्रयत्न म्हणून तिच्यावर उपचार करण्यासाठी केरळ वन विभागाने वनताराच्या तज्ज्ञ डॉक्टरांची मदत मागितली. त्यानंतर मायाला विशेष वैद्यकीय उपचारांसाठी जामनगरला हलवण्याचा निर्णय घेण्यात आला.




मायाचा आतापर्यंतचा प्रवासही खूप संघर्षमय राहिला आहे. १९ एप्रिल २०२५ रोजी मलयाट्टूर विभागातील काप्रिक्काड परिसरात ती नवजात अवस्थेत एकटीच आढळली होती. त्यावेळी तिची प्रकृती अत्यंत नाजूक होती. शरीरात पाण्याची कमतरता असल्यामुळे ती खूप अशक्त झाली होती. त्यानंतर केरळ वन विभागाने तिची सुटका करून अभयारण्यात आणले. तेथे कर्मचाऱ्यांनी चोवीस तास तिची काळजी घेतली आणि लहान मुलाप्रमाणे तिचा सांभाळ केला.




मात्र, मायाच्या अडचणी इथेच संपल्या नाहीत. २ जुलै २०२६ रोजी खेळताना तिचा पाय घसरला आणि तिच्या उजव्या खांद्याला गंभीर दुखापत झाली. त्यानंतर तिच्यावर फिजिओथेरपी आणि विशेष आहाराच्या माध्यमातून उपचार सुरू करण्यात आले. मात्र, या उपचारांचा अपेक्षित फायदा झाला नाही. उलट, तिची प्रकृती आणखी खालावत गेली.